تصدرت الفنانة شيرين عبد الوهاب محرك البحث جوجل وتريند مواقع التواصل الإجتماعي خلال الساعات القليلة الماضية، وذلك بعد إحيائها حفل في مهرجان موازين تعرضت خلاله للعديد من الإنتقادات، نتيجة غنائها بخاصية البلاي باك، مما آثار غضب جمهورها ومحبيها نتج عنها مغادرتهم الحفل.

وحرض عدد كبير من نجوم الفن على دعم شيرين عبد الوهاب بعد هذه الأزمة أبرزهم الفنانة شيماء سيف.

نجوم الفن يدعمون شيرين عبد الوهاب بعد أزمتها الأخيرة

ودافعت شيماء سيف عن شيرين عبد الوهاب، وكتبت من خلال حسابها الرسمي عبر موقع تبادل الصور والفيديوهات القصيرة “إنستجرام”، عبر خاصية استوري، وقالت: "شيرين حبيبتى النجمة صاحبة الصوت الرائع انا اخترت لها الفيديو ده الى هى غلطت فيه فى الكلمات وماشاء الله تداركت الموقف فى لحظة وده عشان بس يبان انها مش بتغنى بلاى باك. وحتى لو هى غنت اول اغنية مع بداية دخولها المفروض منجلدهاش كدا، بالعكس عادى اعتبروها متوترة لانها بقالها كتير مقابلتش جمهورها وبتشجع نفسها لكن احنا بقينا قاسيين اوى اوى".

وأضافت: "أرجوكم كفاية حتى لو حد غلط اسكتوا، مش لازم كله يبقى ناقد فنى وصاحب رأى وعبقرينو، كلنا لينا وقعات وزلات ومش ماشيين غير بستر ربنا. ودى نجمة المفروض نفتخر بيها ونشجعها ترجع وبقوة، مش نكرهها فى عيشتها، وياريت مننساش شيرين يعنى مشاعر يعنى عودتنى الدنيا يعنى طريقى يعنى اه ياليل يعنى ويعنى ويعنى، بحبك ياشوشو يانجمة كبيرة".

كما وجهت غادة عبد الرازق رسالة لـ شيرين عبد الوهاب، من خلال حسابها الرسمي عبر موقع تبادل الصور والفيديوهات القصيرة “إنستجرام” عبر خاصية استوري، وقالت: “مليون سلامة حبيبتي ونورتي المهرجان، بنحبك يا موهبة ماشية على الأرض.. القافلة تسير”.

ووجهت بسمة وهبة رسالة لجمهور المغرب  قائلة " متزعلوش من شيرين وربنا يعلم أنا بحب شعب المغرب قد أيه وبكلمكم بكل احترام  الفنان اللي زي شيرين يستمد ثقته من جمهوره شيرين واضح انها كانت تعبانه وطلعت بهذة الحالة  النفسية دي عشان متزعلكوش، بعاتب دكتور نبيل عبد المقصود إنه طلع قال إن شيرين زي الفل ومفيهاش حاجة لا شيرين كان باين عليها التعب فأنت لما بتقول انها كويسة كده معناه إنك بتقول إنها فنانة مش جديرة تطلع على المسرح أو مش مقدرة قيمة الحدث اللي هي كانت فيه وده طبعا مش صحيح".

وتابعت "ممكن تكون بسبب تعبها كانت عايزه تلبس حاجة مريحة ولبست القفطان، وغناها بلاي باك ده أكبر دليل أن شيرين عبدالوهاب مش كويسة هو في مطربة في حجم شيرين محتاجة بلاي باك وده بيأكد شكوكي أنها تعبانة جدا ".

وأضافت"  لو فضلنا نهاجم شيرين وننتقدها هتنتكس وهنفقدها للأبد بالرغم من إنها صوت لا يعوض في الوطن العربي مع احترامي وحبي لكل الفنانين".

كما دافع عنها الشاعر تامر حسين، وكتب عبر صفحته الرسمية علي منصة "إكس"" تفتكروا شيرين عبد الوهاب ماتتنماش تظهر بأجمل وأكمل شكل   شكلاً ومضموناً ؟ ".

وتابع" واضح إن صوتها كان مُرهق أو مُجهد ورغم ذلك بِترجع وبتحاوِل وبتعافِر ومهتمه و واحشها تِقابل الجمهور وترجع لمكانها ومتعتها ورونقها ع المسرح ومن حق الجمهور يسمعها بأفضل شكل يشجيه ويرضيه ".

وأضاف" بلاش انتقادات قاسية وتطاول غير مُبرر دى بنى أدمة وبِتحس واللى بيتقال من بعض الناس ده  يسد نِفس أى مطرب عن الغُنا تانى  ياريت ماننساش انها صوت عظيم وياما أمتعتنا ونراعي مشاعر الناس".

وأختتم "ياجماعة شيرين صدقونى مرِت بظروف فى مُنتهى الصعوبة تِهد وتنهي حياة بني ادمين فا شوية إنسانية ورحمة لوجه الله فقط الكلمة الطيبة صدقة مابقولكش نافق بس خليك إنسان".