شهد أحد الكافيهات الشهيرة بمنطقة التجمع الأول واقعة صادمة أثارت حالة من الغضب والاستياء على مواقع التواصل الاجتماعي، بعدما اتهمت سيدة عدداً من طالبات مدرسة دولية معروفة بالتعدي عليها وعلى نجلتها، والتسبب في إصابتهما، وخلع حجابها علنًا وسط زبائن المكان، في مشهد وُصف بـ"المهين والصادم"، خاصة مع توثيق جزء من الواقعة عبر كاميرات المراقبة، وتحرير محضر رسمي بالواقعة.

وقالت صاحبة المشكلة، "امبارح في محل شهير فى التجمع انا وبنتى وللعلم بنتى اخر سنة فى الجامعة اللى حصل انى كنت قاعدة انا وبنتى بنشرب قهوة والكلام ده كان حوالى الساعة عشرة صباحا وبعد حوالى نص ساعة من قاعدتنا وفجأة دخل حشد كبير من ولاد وبنات لمدرسة شهيرة إنترناشيونال وليها سابقة فى أحداث مشابهة جدا من اللى حصل ليا انا وبنتى وقبل ما اكمل اللى حصل انا ما قولتش اسماء المدرسة والمحل لأسباب قانونية مؤقتة بس ان شاء بعد الإجراءات القانونية".

وتابعت،" المهم دخلوا الولاد والبنات ومش قادرة اوصف المكان اتحول لهرج ومرج بطريقة فظيعة هزار بصوت عالى ويزقوا فى بعض ويقعوا على الطرابيزة اللى احنا قاعدين فيها انا وبنتى ويرشوا على بعض مياه وكل ده وما تكلمتش خالص بالعكس بقيت ابتسم واقول معلش واضحك انا وبنتى على الهدوء اللى كنا فيه وفجأة المكان اتحول لحاجة مش طبيعية والمسئول  عن المكان يقولهم يا جماعه معلش الصوت يا جماعه مينفعش، المهم ببص على الأرض انا وبنتى لاقينا الأرض عبارة عن ورق وكلينكس وورق الاكل وحاجة بشعة فبضحك لبنتي واقولها لا بجد ايه دا وكلامى لبنتي فسمعت بنت مع العلم المكان ضيق جدا بتقول بصيغة تريقة وبصوت عالى  oh my god  يا جماعة هدوا صوتكوا هدوا صوتكوا عشان طنط مضايقة وتريقة هى وأصحابها بلغة مش هاعرف اكتبها فبصيت لها وقولتلها انتى الطريقة والكلام ده موجه ليا انا قالتلى مالك وتشوح بايديها قولتلها مالى ايه انتى بأى حق تتدخلي فى الحوار مع بنتى وتتريقى عليا عيب كده كل ده وانا قاعدة مكانى راحت المحترمة علت صوتها وقالت انا حرة انتى عبيطة ولا ايه تقصد بالعبيطة دى انا فقمت من مكانى وقولت لها عيب كده واحترمى نفسك ردت وقالت لو ما احترمتش نفسي هتعملى ايه فراحت بنت تانية فى ثانوى ادخلت وشتيمة وقلة أدب فيا وفى بنتى اللى طبعا قالت لها انتوا ازاى بتتكلموا كده مع ماما بدأو يشتموا ويزقوا وهجوم رهيب عليا انا وبنتى".

واستطردت،" وبالتالي انا بدأت ازعق واقولهم انهم مش محترمين وهما نازلين شتايم  بالاب والام وفجأه لاقيت البنتين المحترمين دلقين فى وشى انا وبنتى كوبايه كابتشينو سخن و رد بول و كل اللى كان في ايده حاجه بدا يرميها في وشنا وهدومى بالكامل اتغرقت وبنتى ادلق عليها كابتشينو من شعرها لاخرها ودرعها اتحرق فطبعا اتجننت وبقيت بحاول اوصلها والناس ماسكه بنتي مش عارفه تعملي حاجه وشايفانى والبنت بضربني بالقلم طيرت النضارة من على وشى وكل ده وراحت شدانى بمنتهي القوه برا المحل و قلعتني طرحتى ضربتني بالقلم ومقلعانى الحجاب والامن بيحجز او كان بيصور حقيقي مش فاكره كسروا موبايله وكل دا بنتي جوا عماله تصوت و دالناس مسكاها مش عارفه تعملي حاجه فى الشارع ".

وتابعت،" المهم تلخيصا للأحداث مامتها جت وطلعت مدرسة فى نفس المدرسة بعد ما ولد محترم هو اللى قالى انه عارفها واتصل بمامتها عشان الحصل دا مش طبيعي اه نسيت اقول انها بعد ما اللى شغالين فى المكان دخلونا جوا عشان يهدونا وقفت تصورنى انا و بنتى من وراء الزجاج و تضحك هى وأصحابها من منظر الكابتشينو  اللى حمونا بيه".

وتابعت،" اول ما جيت اطلع الموبيل اصور كل البنات جريت المهم جت مامتها وبالمختصر جاية تزعق و تقولى انتى اللى شتمتيها الاول فقولت انا مش هرد عليكى، بتوع المحل قالولها محصلش الكلام ده يا فندم بنتك ماشفتش تربية دى قلعت المدام حجابها وضربتها ودلقت عليها هى و بنتها الحاجه قالت انتى عايزة ايه دلوقتى باللفظ قولت لها انا هاعمل محضر قالت لى اللى فى ايديكي اعمليه وسابتني ومشيت 
طلعت على المدرسة ما رضيتش تدينى معلومات رغم انى قولت لهم  اسم المدرسة اللى عندهم اللى هى مامتها البنت  قولت لهم تمام ".

وتابعت،" روحت كان جوزى جه على المحل بعد ما كلمته و دخل شاف الكاميرات و بعدها بعتت المدرسة مدرس من عندهم يشوف الفيديو و رجعنا البيت و نزلت حررت محضر و روحت عملت كشف طبي بالاصابات و جانى مكالمات من جدة البنت للصلح و رفضت و المحضر اتحول لجنحة كان الحقيقة مش عايزة أطول عليكوا بس انا عايزة اعرف رأيكم لانه يهمنى و ياريت تنشروا البوست عشان اقدر اخد حقي و انزل الفيديو الموجود في المحل".