تحدّث نجم الأهلي السابق أحمد السيد عن مواجهة الفريق المرتقبة أمام فاركو، في إطار بطولة الدوري المصري الممتاز، مؤكدًا أن الفريق الأحمر عازم على حسم اللقب اليوم.

وقال السيد في تصريحاته مع الإعلامي كريم رمزي عبر برنامج "اللعبة والتانية" على راديو ميجا إف إم: "الأهلي جه من بعيد جدًا الموسم ده، بعد ما كان بعيد عن صدارة الدوري، واللاعبين مش هيفرّطوا في اللقب النهارده."

وعن مباراة الأهلي وإنبي الشهيرة في موسم 2003، قال: "لو المباراة دي اتعادِت، محدش كان هيصدق السيناريو اللي حصل، ضيّعنا فرص سهلة جدًا، لكن ده سيناريو بيحصل كل 100 سنة، وصعب جدًا يتكرر النهارده قدام فاركو."

وتابع: "عماد النحاس اشتغل على الجانب النفسي مع اللاعبين أكتر من الفني، وكولر كان عنده مشاكل كتير، وتخلى عن لاعبين أساسيين، والسبب الرئيسي في رحيله هو خروج ديانغ وعبد القادر."

وأضاف: "رامي ربيعة كان لازم يكون واضح مع الأهلي، هو السبب في اللي حصل له، مماطلته ما كانتش مقبولة، وطلباته كانت صعبة على النادي. نفس الكلام ينطبق على أكرم توفيق، وأتوقع أن رامي ربيعة يكون موقّع لنادٍ آخر."

وعن ظاهرة وكلاء اللاعبين قال: "بقت آفة غريبة إن كل لاعب يجيب والده أو صاحبه أو أخوه علشان ياخد نسبة من التعاقد.. الموضوع بقى رخم بصراحة."

واختتم تصريحاته قائلاً: "أنا مقتنع إن الأهلي بيظهر بوجه مختلف تمامًا في البطولات القوية زي كأس العالم للأندية، والفريق قادر على تجاوز الدور الأول، وعنده سكواد قوي جدًا يقدر ينافس في المونديال."