أجاب الدكتور السيد عبد الباري، من علماء الأزهر الشريف، عن سؤال  أحد الشباب، كيف أحافظ على ديني وأبعد عن أي حاجة تبعدني عن ربنا؟ وكيف أكون ثابت على إيماني وأقوّي إيماني؟".

الطاعة والصمود قدام الفتن، هو ده التحدي

وقال العالم الأزهري، خلال حلقة برنامج "مع الناس"، المذاع على قناة الناس، اليوم الاثنين: "ده سؤال جميل جدًا.. لأنه مش بس سؤال شاب، ده سؤال الدين، سؤال الحياة كلها، لأن الثبات على الدين هو الغاية اللي كل مؤمن بيسعى ليها، ربنا سبحانه وتعالى ممكن يلهم الإنسان الطاعة، لكن الثبات على الطاعة والصمود قدام الفتن، هو ده التحدي".

وأضاف الدكتور السيد عبد الباري، من علماء الأزهر الشريف: "النبي عليه الصلاة والسلام حذرنا من الفتن، وقال إنها بتتعرض على القلوب زي الحصير، عود ورا التاني.. يعني الواحد يخلص من فتنة يلاقي غيرها، ليه؟ لأنها الدنيا، دار ابتلاء واختبار، مش أي حد يقول آمنا ويمشي، لأ، لازم يُفتن ويُبتلى".

وأكد العالم الأزهري أن الحل هو في المجاهدة، مستشهدًا بقوله تعالى: "والذين جاهدوا فينا لنهدينهم سبلنا"، مضيفا: "جاهد نفسك، والله هيسددك ويعينك، وسيدنا قال: من رام الحياة بلا مجاهدة فقد رام المحال".

وتابع: "أهم حاجة يا ابني.. الصحبة، اختار صحبة صالحة تعينك على الطاعة، وإياك والصحبة السيئة، النبي نفسه لما واحد جه له وقال له: أنا قتلت 100 نفس، قال له تب وبعدين روح أرض ناس بيعبدوا الله واعبد ربنا معاهم، وما ترجعش لأرضك القديمة لأنها أرض سوء.. البيئة والصحبة ليهم تأثير كبير جدًا، خد بالأسباب، وحافظ على صلاتك، وابقى قريب من أهل الطاعة، وربنا يثبتك ويعينك يا رب"