حرصت الفنانة بتول الحداد على مشاركة جمهورها تطورات حالتها الصحية لـ يطمأنوا عليها، وذلك بعد نداء الاستغاثة التي قامت به أمس، بعد تعرضها للضرب والابتزاز من برلماني سابق يريد الزواج منها.

بتول الحداد تطمئن جمهورها عليها بعد نداء الاستغاثة 

وكتبت بتول الحداد من خلال حسابها الرسمي عبر موقع تبادل الصور والفديوهات القصيرة إنستجرام، عبر خاصية استوري: “صباح الخير على حضراتكم جميعا، أنا بطمنكم عليا، أنا الحمد لله كويسة وبخير كنت بخلص إجراءات طبية بسبب الإصابات اللي في جسمي، وإجراءات قانونية والحمد لله إحنا في بلد قانون”.

وأضافت:" الحمد لله  وشكرا لكل الدعم والحب وآسفة لكل القلق والذعر اللي حسيتوه بسببي. آسفة لقلكم وخوفكم عليا وحبكم ودعمكم ليا فوق فوق راسي والله". 

واستكملت: "أنا كويسة الحمد لله وبدأت العلاج وإن شاء الله تبقى آخر الأيام الصعبة… وأخيرا لكل شخص غلط في حقي أو ذم في سمعتي وعند الله تجتمع الخصوم”.

وكانت آثارت الفنانة بتول الحداد الجدل خلال الساعات القليلة الماضية، وذلك بعد ظهورها في فيديو منهارة من البكاء، وتطلب الاستغاثة بعد تعرضها للضرب والابتزاز من برلماني سابق يريد الزواج منها.

ونشرت بتول الحداد فيديو من خلال حسابها الرسمي عبر موقع تبادل الصور والفيديوهات القصيرة “إنستجرام”، وقالت: “أنا بتول بكل أسف بيتعرض لي شخص كان نائب سابق في مجلس الشعب مش قادرة أقول اسمه عشان ميبقاش سب وقذف بعد كل اللي بيحصل فيا”.

وأضافت: “كنت بحبه سنتين وهو بيحبني، وكنت دايما برجع وأقول أنه مينفعش وإن هو مسيحي وأنا مسلمة وإنه مش هينفع، اتفقت أنا وهو إننا منكملش عشان مش هينفع.. جالي خطوبة اتنين من أصدقائي وعملي مشكلة والناس لما شافوه بياخدني من وسطهم اتخانقوا معاه وأنا نزلت جري قعدت في عربيتي عشان مش عارفة أروح فين..وعشان خايفة أروح بيتي وخايفة على نفسي على أصحابي، كلمته قلت له لو عندك مشكلة معايا تعالى حلها معايا وبلاش فضايح قدام الناس أنا معروفة وأنت معروف وبلاش تعمل كده ضربني في العربية وشي وارم ورقبتي وارمه لدرجة أن الناس بتوع الباركينج شالوه من فوقي قبل ما يموتني”.

كما طلبت الاستغاثة من جمهورها ومتابعيها، وقالت: “انا بستنجد بيكم وانكم تقفوا جنبي مش عايزه أكمل في حاجة غصب عني، أنا اتهنت وانضربت عايشة تحت التهديد وطول الوقت باحاول أتكلم مع البني آدم ده لأنه طول الوقت بيبتزني ومعيشني في رعب ورهبة وأنا طول الوقت بحاول اتكلم معاه واهدي الدنيا عشان أبقى عايشة في أمان، بس أنا خلاص أنا يا إما هموت نفسي عشان أنقذ نفسي من البني آدم ده يا إما هو يبعد عني ويتعهد أنه يبعد عني”.

وأوضحت: “ده واحد مصمم نبقى مع بعض بالعافيه هو مسيحي وأنا مسلمة يعني مصيبة كل مرة كنت بحاول أبعد كنت بتأذي وانضر وكنت بحاول أمشي الدنيا من غير ما أعمل حاجة غلط، بس أنا خلاص حاسة أني في كابوس ومش عارفة أفوق منه”.

وأختتمت: “حاولت أسيب البلد كلها وأمشي مش عارفة لأن شغلي هنا ومستقبلي هنا، بقالي 13 سنة شغالة في التمثيل من وأنا في أولى معهد”.