كشف مصطفى يونس، نجم الأهلي السابق، عن انقطاعه التام عن زيارة مقر النادي منذ سنوات، مؤكدًا أنه يشعر بأن الأهلي لم يعد كما كان، وأنه أصبح غريبًا عن جيله.

وقال يونس في تصريحات عبر إذاعة «أون سبورت إف إم»: «لم أتقابل مع الكابتن محمود الخطيب منذ سنوات طويلة، ولم أدخل النادي الأهلي منذ ما يقرب من 8 سنوات. الأهلي مبقاش بتاعنا».

وأضاف: «ناس تانية هي اللي بقت تقعد في النادي، مش إحنا. وأنا مش الوحيد اللي بطل يروح، ده جيل كامل مبقاش يزور النادي».

وعن سبب ابتعاده، أوضح: «أنا شخص عصبي جدًا، ومش بحب الاحتكاك. رغم إن الأهلي بيتي، وخيره عليا وعلى أولادي، لكن طبيعتي مش بتسمح لي أسكت لو شُفت حاجة غلط».

وعن حفل افتتاح الاستاد الجديد للنادي، علق يونس قائلًا: «محدش وجه لي دعوة لحضور الحفل، وفوجئت به على التلفزيون. لكن بصراحة كنت مبسوط جدًا، لأن وجود استاد للنادي الأهلي كان أمنية حياتنا».

واختتم بتعليق لافت عن ما وصفه بتجاهل الرموز: «محدش يقدر يمسح تاريخي. نفس اللي حصل مع عصام الحضري أعظم حارس في تاريخ مصر كان موجود في حضور مجلس الإدارة، وما حدش سلّم عليه! ده حتى السلام لله!».