وجّهت الفنانة الشابة ملك زاهر رسالة شكر وامتنان لجمهورها وكل من سأل عنها خلال أزمتها الصحية الأخيرة، التي مرت بها فجأة وأثارت حالة من القلق بين متابعيها ومحبيها.

وكتبت ملك عبر حسابها على "إنستجرام":"بصراحة، ما كنتش متخيلة حجم التفاعل والاهتمام اللي شوفته. لما قررت أتكلم عن حالتي الصحية، كنت مرعوبة لأن لا أنا ولا الأطباء كنا فاهمين إيه السبب الحقيقي، وده خلاني أشارك علشان أوضح إن حياتنا مش كلها مثالية، فيها الحلو وفيها الوحش."

وأضافت:"أنا ما كنتش عايزة أقلق حد، وقلت إني كويسة، بس كنت محتاجة أكون صريحة، لأني فعلاً كنت في حالة خوف حقيقي. عندي ثقة كاملة في ربنا إنه هيقومني بالسلامة، وكنت بدعي وأتمنى إن تكون حاجة بسيطة."

 اللحظات الصعبة

وأشارت ملك إلى أنها لا تحب عادة مشاركة اللحظات الصعبة، لكنها تأثرت كثيرًا بدعم الجميع، قائلة:"بشكر من قلبي كل شخص دعا لي أو سأل عني، والله كل كلمة كانت بتوصلني. آسفة لو ما عرفتش أرد على كل الناس، وبشكر زملائي وأساتذتي وأصدقائي وعيلتي اللي كانوا جنبي في كل لحظة."

وكشفت عن تطورات حالتها الصحية بقولها:"الحمد لله دلوقتي بطلت أروح المستشفى، وتحسّنت كتير، ربنا لطف بيا، واتضح إن السبب حساسية شديدة جدًا في الدم، حاجة كانت مُقلقة وخوفتنا، لكنها مش خطر الحمد لله."

واختتمت كلامها برسالة طمأنة:"أنا في تحسن مستمر، وبشكر ربنا إن الأزمة عدّت على خير. آسفة لو خوفتكم، بس ده ما كانش قصدي أبدًا، وشكرًا على الحب والدعم اللي غمرتوني بيه.. فعلاً حسّيت قد إيه أنا محظوظة بيكم."