يأتي العيد ويحل معه أجواء من السعادة والبهجة، وشارك عدد  من الفنانين في تصريحات خاصة لـ "مصر تايمز" عن خططهم لاحتفال بالعيد الأضحى المبارك، بين من قرر البقاء مع العائلة في أجواء دافئة، ومن ارتبط بسفريات للعمل خارج مصر.

حسام داغر

العيد هقضيه في أمريكا لعرض فيلم "40 يوم" هناك وفي جولة للفيلم بالولايات المتحدة.
لكن عندنا حفلة تانية بحضور السفير المصري ونجوم عايشين هنا في لوس أنجلوس يوم 6 و7 و8 يونيو، وده بيتوافق مع عيد الأضحى في العالم العربي.

مشيرة إسماعيل

هتقضيه في البيت مع بنتي، كانت صحتي تعبانة شوية وكنت في وعكة صحية، انا في فترة النقاهة كده، هقضيه مع بنتي واخواتي اللي موجودين في مصر يعني. احنا عندنا أسرة كبيرة واخواتي وولادهم، وعلى طول متواصلين مع بعض، وقريبين من بعض.

أحمد خالد صالح

هقضي العيد مع العيلة اكيد، ندبح ونتبسط مع العيلة ومع الاطفال اللي في العيلة، ونقضي يومين حلوين ان شاء الله، واحنا  موجودين مع العيلة هنا في القاهرة، لسه مش متأكدين هنسافر ولا لا.

محمد علي رزق

هقضي العيد في البيت انا بخرج بعد العيد، ما بحبش الزحمة، انا دايما بقضيه في البيت.

ماجد القلعي

زي اي حد، مفيش حاجة معينة، يعني مش بسافر في حتة ولا حاجة، انا ببقى قاعد مع العيلة وكده، حاجة عائلية مش اكتر، مع اولادي ووالدتي.

ممكن نتغدى سوا في البيت، مش من هواة الخروجة والحركة في الاعياد، عشان الزحمة، ما بحبش الزحمة والدوشة، بحب اقعد مع العيلة في البيت.

انتصار

هقضي العيد في إسكندرية كالعادة، لأنني اسكندرانية وبحب اقضي العيد دائما هناك.