كشف الفنان ماجد القلعي عن دوره في مسلسل “عايشة الدور”، موضحا مشاركته في العمل وكيف حضر للدور.

مسلسل “عايشة الدور”

وقال الفنان ماجد القلعي، في تصريحات خاصة لـ"مصر تايمز": “هي الشخصية جات لي عن طريق أستاذ أحمد الجندي، مؤلف المسلسل والمخرج في نفس الوقت, هو رشحني للدور، فقريت المكتوب”.

وأضاف: “طبعا، المسلسل ماكنش كله مكتوب وقتها، كانت القصة وبعض أجزاء من السيناريو جاهزة، لكن القصة كانت مكتملة، فشرح لي الفكرة، وبدأت أكون كاركتر على أساسها، بحيث يناسب طبيعة الشخصية”.

ونوه: “رسمت له شخصية وتقمصتها، زي ما كنت بعمل كده في الشخصيات العامة اللي كنت بقدمها في برامجي، عملت له أعياد  يعني تفاصيل زي إنه بيتكلم بسرعة، ليه طريقة، حاسس إنه ضارب الدنيا، مش هامه حاجة، عايز يقضي حياته كلها بضحك وانبساط، ما بيحبش النكد والهم والحاجات دي”.

وتابع: “كونت الشخصية بالطريقة دي، وبدأت أعيشها، أول ما بدخل اللوكيشن وبلبس الشخصية، بعيشها فعلاً، حتى في سنه الكبير نوع من التقمص الكامل”.

واستطرد قائلًا: “أنا كنت متوقع نجاح العمل نفسه، مش دوري تحديدا، وده طبعا عشان دنيا سمير غانم، مفيش كلام، عاملة فوازير رمضان، استعراضات وغنا وتمثيل، فن متكامل، وهي عندها قبول وشعبية ضخمة جدًا في الوطن العربي كله، فكوني موجود في عمل معاها، ده طبعا كان متوقع له النجاح”.

وأوضح: “لكن دوري أنا؟ كنت منتظر رد فعل الناس، لأني الناس شافوني قبل كده في برامج، لكن ده أول مسلسل تلفزيوني درامي ليا وكنت عملت مسرح في كندا وفي مصر، لكن ده أول عمل درامي تلفزيوني، فكنت في حالة انتظار وترقب، بس الحمد لله الناس كانت مبسوطة”.

وأردف: "في أعمال جديدة، بعد ما الناس شافتني بشكل مختلف، المنتجين والمخرجين بقوا شايفين صورة جديدة ليا، مختلفة عن البرامج والحفلات، قبل كده، كان في لبس: "هو ده ينفع في الدراما أو السينما؟" لكن بعد المسلسل، ردود الفعل كانت كويسة، طبعا لسه حاجات في مرحلة كلام، مش ينفع أتكلم عنها دلوقتي غير لما تبقى مؤكدة".

واستطرد "القلعي" قائلا: “اتعرض عليا حاجة، لكن ما قبلتهاش، لأني بحب أقدم عمل يكون في نفس مستوى اللي قدمته قبل كده فنيا وإنتاجيا، حتى لما عملت المسلسل، كان مع شركة كبيرةء مش الموضوع مادي، لكن لازم المستوى الفني يكون عالي، عشان جمهوري يشوفني بالشكل اللائق”.

وأوضح: "اتعرض عليا حاجات بعد "عايشة الدور"، بس لو كنت قبلتها، كانت هتبقى أضعف، والناس مش هتتقبلني زي ما حصل مع المسلسل، فأنا منتظر عمل جيد، بإذن الله".

واختتم ماجد القلعي: “اللي عجبني في الدور ده بالذات، إني لأول مرة ألاقي جمهور جديد بيتابعني، قبل كده، أعمالي كانت بتستهدف فئة معينة جيلنا أو مواليد التسعينات، السيدات، لكن المسلسل ده لقيت أطفال في الشارع بيكلموني، طلبة مدارس، خصوصا البنات في إعدادي وثانوي، بقوا مهتمين وبيتابعوني، وده أسعدني جدًا”.