كشف الإعلامي  شريف مدكور، عن رغبته في تقديم برنامجا دينيا، حيث حرص على دراسة الدين لمدة تصل لخمس سنوات، مضيفا لمتابعته للشيوخ ولكن يراى أراء عكسية ومذاهب مختلفة، مما جعله يتجه لدراسة الدين بنفسه.

شريف مدكور

قال شريف مدكور في إحدى التصريحات التلفزيونية: "أنا أتمنى، أو خليني أقول، حلمي بجد إني أعمل برنامج ديني، يمكن الناس تتفاجئ، بس أنا بقالي أربع أو خمس سنين بذاكر مذاكرة فظيعة في الدين، مع نفسي، يمكن أكون كاتب حاجة بعض الناس بينتقدوني عليها، بس أنا شيخ نفسي".

وتابع: "مع كامل احترامي لكل رجال الدين في كل الديانات، ولكل الشيوخ، وكلهم على راسي من فوق، لكن لما قعدت أتابع، لقيت الشيخ ده بيقول عكس الشيخ ده، والمذهب ده بيقول عكس المذهب التاني، وهنا غير هنا، وطب أنا أمشي مع مين؟"

وأضاف: "فأنا اللي عملته إني سمعت الكل، وقريت للكل، وبعد كده قلبي استفتيته، وعقلي فكرت بيه، وربنا قال "اقرأ"، وأنا قرأت في كل حاجة، أنا قريت ديني كويس قوي، ديني اللي بحبه جدًا، وقرآني اللي معتز بيه جدًا، ورسولي".

واختتم قائلًا: "أنا لو قاعد دلوقتي قدام الرسول عليه الصلاة والسلام، كان هيقول لي إيه؟ فبستشيرة، أنا واصل للدرجة دي".

جدير بالذكر، شريف مدكور الذي كان قد أعلن  في أبريل 2019 إصابته بورم في القولون ليخضع بعدها لسلسلة من العمليات الجراحية التي انتهت باستقرار حالته وتعافيه تدريجيا مع مرور الوقت، قال في حواره إن الأطباء قالوا له أن هناك السبب الأبرز لإصابته بالورم  يتمثل في " الزعل" قائلًا: "الدكاترة قالوا لى ان اللى حصلى ده من التوتر والعصبية بسبب التنمر اللى كانت بتعرض له، انا أبان صلب للناس لكن من جوايا بتعب، وساعتها ناس كتير من اللى كانوا بيتمروا عليا، طلعوا يصالحوني، وأسفهم ليا مش مقبول، ومش مسامح، لانه مكنش له حق تخش في عرضي وتنتهكه".

وأضاف أن الضيق النفسي والهجوم السخيف الذي يتعرض له بين الحين والآخر، بالتزامن مع عدم البوح أو الفضفضة، كان من بين اسباب تعبه، بحسب ما أخبره الأطباء.

برنامج الرحلة، تقدمه الإعلامية ريهام السهلي، ويذاع على منصة dmc plus، الجمعة الثامنة مساءا، ويستضيف البرنامج نجوم المجتمع، بمختلف المجالات الفنية والرياضية والسياسية ليتحدثوا عن التجارب الإنسانية والمهنية في حياتهم.