كشفت الفنانة دينا فؤاد عن حجم الشغف الذي تكنّه لمهنتها كممثلة، مؤكدة أن التمثيل ليس مجرد مهنة بالنسبة لها، بل هو الهواء الذي تتنفسه والشغف الذي يحركها، لدرجة أنها تشعر بالموت البطيء كلما ابتعدت عن الكاميرا، حتى لو كانت تعيش حياتها اليومية بشكل طبيعي.

وفي لقائها مع المحامي الدولي والإعلامي خالد أبو بكر، والإعلامية راغدة شلهوب، ببرنامج "آخر النهار" على قناة "النهار"، قالت دينا: "أنا بنام وبصحى وباكل وبخرج وبشوف أهلي وأصحابي، بس لما ماكنش بصور، بحس إن الأيام بتعدّي من غير أي إنجاز.. بحس إني مش بعيش فعلًا".

وتابعت: "الفن هو عالمي، هو المكان الوحيد اللي بحس فيه إني على حقيقتي، وبحقق نفسي.. فترات البُعد عن التمثيل بتكون قاسية، حتى لو الناس شايفاني عايشة ومبسوطة، أنا من جوايا بحس بالفراغ".

وحين سُئلت عن موقفها إذا خُيّرت يومًا بين الحب والعمل، أجابت بثقة ووضوح:
"مافيش حاجة اسمها اختيار.. أنا باختار التمثيل، دايمًا شغلي هو رقم واحد، ومش هضحي بيه علشان أي حاجة، حتى لو كانت علاقة حب".

وأضافت: "اللي يحبني لازم يحب طموحي ونجاحي، ويفهم إن الفن مش مجرد شغل، ده حياتي كلها. وأنا مش إنسانة منفصلة عن شغلي.. أنا دينا اللي الناس تعرفها من أدوارها وطموحها، ومينفعش حد ييجي يطلب مني أسيب ده علشانه".

واختتمت دينا فؤاد حديثها برسالة صريحة وواضحة، قائلة:
"أنا باكيدج كامل.. دينا بطموحها، بفنها، بحبها لشغلها.. اللي مش قادر يستوعب ده، ببساطة مش هينفعني".